這天步進銀行，兩位妙齡少女正推銷銀行信用卡，其中一位眼睛戴了藍色contact lens的少女擋在身前，「小姐，有冇我地銀行信用卡呀！依家申請即刻送迎新禮品喎。」
少女二十來歲，見我展露好奇目光，即把握時機：「小姐，淨係填張表格，確認申請已經有禮品，就算唔批都唔使退番！」我回應：「咁筍？」一直對這種推銷工作好奇，想多了解。
「你地一張卡分到幾多佣？」填寫資料期間，開始八卦。「睇下賣到幾多張啦！少嘅十幾蚊，到某個額就有20蚊一張。」難得少女坦率。
「你一日賣到幾多張？」我好奇。少女微笑不語，旁邊「少女二號」插口：「佢一日賣廿幾張，好勁架！」即每日400元佣金，每月工作20天有八千元，加上最低工資底薪，對初入職場的少女來說，算是不俗。
少女還告訴我，有男sales為了追數，會自己出錢買超市贈劵送給客人。「倒貼打工？」我驚訝。
「個男仔怕俾人炒，話女朋友唔想佢冇野做，話晒銀行工，著西裝返工喎！」少女說。原來，對年輕男士來說，能穿著西裝上班，仍然存有優越感。