公司在東區，沒有受到佔中波及，不過卻有年輕同事趁假期及放工時間先後跑到金鐘及旺角，說要親身支持，見證大時代喎。
本來想叫人開OT，但大是大非面前真的不敢阻住地球轉。試過有日中午，年輕同事P與上司同檯食飯，上司口痕批評佔中人士，即時引起P激烈反應，忽然間酒樓變了維園，雙方各自發表政見，你一言「俾人利用都唔知」，我一語「唔爭取對唔住香港」，跟住氣氛僵住，互相對峙差啲以為身在黑夜旺角。

「仲講，快啲食埋返公司啦！」我硬住頭皮打圓場。好在大家總算畀面，冇再爭吵。
講真，在辦公室雖然好多人事鬥爭，但係職場的政治跟現實的政治不同，在工作上鬥個你死我活，為的不外乎爭升職爭上位，博老闆好感博加薪。
但係社會政治運動，可以是拋頭顱灑熱血，命仔不要，特首都冇面畀，何況上司！所以計我話，在辦公室最好不談政治，搵食地頭嘛，無謂影響合作關係啦！