大家不知是否記得我個姊妹June，之前說過她面試請90後同事的經歷，後來她終於不情願地請了個90後同事，隔了這陣子，June大呻新同事很難教。
June勞氣地說：「叫佢做嘢永遠唔會即刻做，總係提出問題，未做就先講有乜困難，呢樣唔掂、嗰樣唔好，花時間同佢解釋我都做完啦！又怕佢做錯，結果我做得仲多過佢，都唔知請佢返來做乜！」

其實June升職也只是近年的事，做上司教新人的經驗著實不多。
「咁你想點？炒佢？」我問。June聳聳肩，做出沒好氣的表情。
「就算炒咗佢，咪又要請過第二個，問題都會重複！我勸你不如積極面對。」我好言相勸。
「既然用新人，就要有心理準備，新人提出問題，係因為無經驗，學習係正常過程；強調困難，係因為恐懼，唔了解自己能力，怕做唔到成果。做上司嘅，唔應該責罵，咁樣會打擊佢哋自信，事情反而更糟。相反應該多加鼓勵，增加佢信心，放膽試吓。」嘩，我忽然間自覺頭上多了光環。

「唉，我怕佢做錯，要我執手尾嘛！」June口氣已有轉變。
「哎呀，邊個冇做錯過嘢，你阿June姐以前咪又係出名大頭蝦，依家一樣咁醒！每個人都有起步，佢學習嘅同時，你都學習緊做上司！你想教識佢多個人幫手，抑或鬧到變成敵人，你自己諗下！」我跟June說。